في مجال ال logo design هتلاقي ان اللوجو ممكن يكون حروف بس وده اسمه logotype أو الشعار النصي أو مكون من مجموعة من الأيقونات والرموز وبكده يكون بينتمي لفئة ال logomark أو الشعار الرمزي. لكن ايه الفرق بين النوعين وايه المُفَضَّل استخدامه بينهم؟!.
Contents
الفرق بين النوعين
أولاً الشعار النصي بيتم استخدام فيه كلمة تشير الى اسم البيزنس أو البراند المُصَمَم له اللوجو ومن أشهر الأمثلة على النوع ده ياهو وجوجل وكوكاكولا.
ثانياً الشعار الرمزي فهو عبارة عن رمز معين بيعبر عن البراند أو بتكون مشهوره بيه بدون الحاجة لاستخدام اسم البراند ذي Adidas ومرسيدس وكمان Nike.
امتى نستخدم كل نوع؟!
الشعار النصي :
عادةً انطباع او التوقع الأول للناس لما تسمع عن لوجو لبراند معين انه هيكون مكون من اسم البراند ، فكرة الشعار من النوع ده انه بيتم تصميم الاسم بشكل خاص معبر عن احتياجات البيزنس ومن الممكن دمج الأشكال الهندسية مع حروف اسم البراند لاضفاء تأثير معين عليها ، ومن الشائع الاستعانة بألوان معبرة عن هوية البراند وبالتالي انت مش محتاج تستخدم رمز في تصميم اللوجو وده الهدف من الشعار النصي المعتمد على ال typography في تصميم شعار معبر عن هوية البيزنس.
قواعد مهمة في تصميم الشعار النصي
- اللوجو لازم تستخدم في تصميمه برنامج Adobe Illustrator وتتنجنب استخدام Adobe Photoshop والسبب ان التصميم لازم يكون محتفظ بجودته مهما اختلف حجمه ، يكون واضح سواء طبعناه على حجم صغير أو كبير.
- مهم ان التصميم ينفع يتعمل منه نسخة بلون واحد ذي الاسود أو الابيض ويظل واضح وممكن التعرف عليه.
- طبيعي ان اللوجو هيتم وضعه على كل ما يخص البراند وبمختلف الأحجام فمن المهم انه يظل مقروء وحروفه واضحه للعيان بدون ماتواجهه صعوبة في التعرف عليه.
- الألوان عنصر مهم جدا في التصميم لكن الأفضل انك تلتزم بألوان معينة بدون ما تحيد عنها بحيث انها تعبر عن البراند وتكون مريحه للعين .
الشعار الرمزي:
مصممي الجرافيك بيأكدوا انهم بيلجأوا لتصميم الشعار النصي أكتر من الرمزي ولكن ده لا يعني انه مش مستخدم ، بالعكس فيه أمثلة كتيرة تم استخدام النوع ده فيها وكانت تجربة ناجحة ذي Apple اللي فضلت انها تستخدم التفاحة كرمز معبر عن البراند بدون الحاجه للاستعانة بحروف الاسم.
لكن هل انت في حاجة لاستخدام الشعار الرمزي ؟!
اللي يقدر يحدد مدى احتياجك ليه من عدمه هو نوع البيزنس اللي بتعمله التصميم ومدى قدرتك على ربط التصميم بهوية البراند بالنسبة للعملاء وده بيرسخ قيمة الشعار الرمزي وهو تعزيز هوية البراند وتسهيل فهمه، واذا كان معبر بشكل ناجح عن البراند هيكون البديل عن الاسم والسمة الرئيسية أو الواجهة اللي من خلالها بيتعرف الناس على البراند.
ايه المواصفات اللي تضمن فعالية الشعار الرمزي؟!
ذكرنا قبل كده ان Apple واحده من أنجح الأمثلة أو التطبيقات على النوع ده من التصميم لكن فيه أمثلة تانية اندثرت ومكانتش ناجحة ، بالعكس أخطأت التعبير عن هوية البراند ، وبالتالي محتاجين نسأل نفسنا ايه اللي بيخلي تصميم ينجح وتصميم آخر يفشل ويموت البراند معاه ؟!.
- التفرد : يعني التصميم يكون فريد من نوعه ومافيش وجه شبه بينه وبين أي تصميم آخر ممكن يسبب لخبطة للناس وبيعبر عن أفكار البيزنس وهويته.
- ليه معنى ومدلول: مينفعش تعمل تصميم بشكل اعتباطي ومش بيحكي قصة البراند أو على الأقل بيوصلك منه رسالة معينة وخير مثال على كده هو مرسيدس والنجمة الثلاثية المكونة لشعارها واللي بتعبر عن تواجد مركبات مرسيدس في الأرض والبحر والهواء واتطورت القصة اللي بتوصلنا من التصميم الى ان وصلت انها تعبر عن الأناقة والفخامة حاليا .
- لايُنسى: الهدف الرئيسي والمهم للبراند انها ترتبط في عقل الناس باللوجو وانه يكون الربط ده حاضر في ذهنهم في كل وقت بيشوفوا فيه اللوجو .
- المرونة: ان اللوجو يكون سهل التعديل عليه بما يتوافق مع التغيير اليومي اللي بنعيشه والتطور المستمر بدون ما يفقد هويته أو ارتباطه بالناس أو البراند أو يتحول لتصميم تاني مش مألوف للبراند ويلخبط الناس.
وبغض النظر اذا اختارت الشعار الرمزي أو النصي أو كلاهما فالمفتاح اللي هيتسبب في نجاح التجربة من عدمها هو جودة التصميم وتوافر كل الصفات اللي ذكرناها فيه بشكل يبرز هوية البراند ويضمن لها منافسة قوية في السوق وكسب ولاء العملاء.