إعلان كوكاكولا على سناب شات .. نتعلم منه إيه ؟

سناب شات وسيلة تواصل اجتماعي للشباب بيستخدمها حوالى 100 مليون مستخدم يوميا حول العالم معظمهم من سن 12 لـ 24 سنة و بالتالى بيمثل ميديا مناسبة جدا للبراندات الخاصة بالأكل أو الشرب إنها تقدم إعلاناتها للفئة العمرية دي .

و كغيره من وسائل التواصل الإجتماعى بيسعى أنه يخلق طفرة فى التسويق للبراندات الكبيرة و منافسة الدعاية عبر التليفزيون و المجلات المطبوعة .. و رغم إن معظم البراندات الكبيرة مازالت بتضخ مبالغ كبيرة فى الدعاية المطبوعة و التليفزيونية ( 36 مليار دولار تم انفاقهم السنة دي بس على الدعاية المطبوعة فى الجرايد و المجلات حول العالم )  إلا إن وسائل التواصل الاجتماعي فيسبوك و تويتر و سناب شات و غيرها بتراهن على قدرتها التسويقية للبراندات الكبرى و تحقيق نتايج أعلى من أي من أى ميديا تانية ..

ليه البراندات الكبرى ؟ لسبب منطقى جدا و هو سهولة الحكم على الحملات الإعلانية المدعومة بمبالغ عالية من الشركات الكبيرة أكتر من الحملات بميزانيات صغيرة اللى بتخلى من الصعب الحكم بوضوح على نتايج الحملة و نجاحها .

نقطة قوة سناب شات كسوشيال ميديا هى إنك عارف مين الجمهور اللى بيتابعك و أعمارهم قد إيه .. و هما متفهمين القوة دي كويس و بيستخدموها فى حملاتهم الإعلانية .. لكن فى الفترة الأخيرة أعلنت الشركة إن نسبة من 60% إلى 70% من المستخدمين بيقفلوا الفيديوهات بعد 3 ثوانى بمجرد اكتشاف الغرض الإعلانى ليها .. لكن شركة كوكاكولا ماستسلمتش للإحصائية دي ! و فكرت فى طريقة غير طريقتها المعتادة فى الإعلان لجذب أكبر عدد من مستخدمي سناب شات و عمل محتوى إعلانى مُهيأ ليهم كشباب فى سن صغير .

من حوالى شهر و تحديدا مع بداية السنة الدراسية الجديدة كوكاكولا عملت فيديو مدته 10 ثوانى مخصص لسناب شات بس .. قدرت من خلاله إنها ترفع نسبة مشاهدة الفيديو كامل لـ 45% و أعلن مسئول المحتوى الإعلانى لكوكاكولا إنهم فى الفترة الأخيرة اتعلموا انهم محتاجين يغيروا من الطريقة اللى بيخاطبوا بيها مستخدمين سناب شات
(We learned we needed to adjust the way we talk to Snapchat’s audience, because they detect when it’s advertising)

فكرة الفيديو كانت فى إنه يظهر بشكل طبيعى مشابه لفيديوهات المستخدمين مش كإعلان من براند .. و هو بيظهر شاب بيجهز نفسه و الزي المدرسي استعدادا لعودة الدراسة و كوكاكولا هنا ماستخدمتش اللوجو كالمعتاد فى الإعلانات و ده مقصود و لكن اكتفت بوضعه بشكل ذكي على تيشيرت الشاب علشان مايتعاملش على إنه ad و محتاج approve من جهة سناب شات و كمان بالنسبة للمشاهدين نفسهم .

الفيديو (تقدر تشوفه من هنا : http://bit.ly/1LyVCfi ) حصل على engagement كبير جدا و عمل نقطة تحول فى الدعاية على سناب شات و السبب ان المستخدمين ماحسوش انه فيديو دعائي بالصورة المعتادة و هنا كان التغيير اللى بدأت تتعلم منه البراندات التانية فى الدعاية على تطبيق سناب شات . 

قولنا إيه رأيك فى الفيديو و استفدت إيه من فكرة كوكاكولا ؟ :)